ინტერიერის დიზაინი – კარტოზიას ქუჩა

დიზაინერი — ნინო ქართველიშვილი

ეს პროექტი აერთიანებს ჯაპანდისა და Mid-Century Modern-ის სტილებს — ბუნებრივ სიმშვიდეს, თბილ ფერებსა და შუა საუკუნის მოდერნისთვის დამახასიათებელ ფორმებს. ინტერიერი მინიმ ალისტურია, თუმცა ფერებისა და დეტალების წყალობით თბილი და ხასიათიანი.
ფერების პალიტრის საფუძველს ქმნის თბილი თეთრი და კრემისფერი ტონები, რომელსაც ტერაკოტისფერი აქცენტები ავსებს. ტერაკოტა გვხვდება როგორც რბილ ავეჯში, ისე კედლის ფრაგმენტებსა და დეკორში და სივრცეს უფრო ღრმა და გამორჩეულ ხასიათს აძლევს. ზეთისხილისფერი დეტალები კი ბუნებრივ პალიტრას კიდევ უფრო ამდიდრებს.
ინტერიერში ერთ-ერთი მთავარი მასალაა ხე. მისი თბილი ფაქტურა გამოყენებულია სამზარეულოს ფასადებში, იატაკზე, ავეჯსა და ცალკეულ დეკორატიულ ელემენტებში. სხვადასხვა ტონის ხის კომბინაცია სივრცეს ბუნებრივ სითბოს მატებს და კარგად ერწყმის როგორც ნეიტრალურ, ისე ტერაკოტისფერ ზედაპირებს.
განსაკუთრებულ როლს ასრულებს მომრგვალებული ფორმები და Mid-Century Modern-ის ხასიათის ავეჯი და განათება. რბილი ხაზები, თაღოვანი ღიობები, განსხვავებული ფორმის სანათები და გრაფიკული პანოები ინტერიერს ინდივიდუალურობას მატებს და მინიმალისტურ გარემოს უფრო ცოცხალს ხდის.
სივრცის მნიშვნელოვანი ნაწილია მცენარეებიც — მათი ბუნებრივი მწვანე ფერი და ორგანული ფორმები აბალანსებს ხისა და ტერაკოტის თბილ ტონებს. მცენარეები სხვადასხვა ზონაში მეორდება და ინტერიერის ბუნებრივ, მშვიდ განწყობას კიდევ უფრო უსვამს ხაზს.
საბოლოოდ, მიღებულია თბილი, მშვიდი და თანამედროვე ინტერიერი, სადაც ჯაპანდის ბუნებრივი სიმარტივე Mid-Century Modern-ის უფრო გამომსახველ ფორმებსა და ფერებს ერწყმის. ხე, ტერაკოტისფერი აქცენტები, რბილი განათება და მცენარეები სივრცეს მყუდრო და ინდივიდუალურ ხასიათს სძენს.