ოთახში შესვლისას ოდესმე თუ გქონიათ უცნაური გრძნობა, თითქოს ჩვეულებრივი ნორმალური ოთახია თუმცა მაინც რაღაცა გაწუხებთ, თან ვერ ხვდებით რა? შეიძლება საქმე ფერშია. ინტერიერში ფერი იგივე როლს ასრულებს რასაც სანელებლები კულინარიაში: თუ გადააჭარბებ – კერძი გაფუჭდება, თუ არასაკმარისი იქნება – გემო არ გახდება სრულფასოვანი. მოდით, განვიხილოთ, როგორ ავირჩიოთ იდეალური ფერთა პალიტრა ჩვენი სახლისთვის და ჩავიხედოთ მომავალში, რომ გავიგოთ, რა ფერები იქნება ყველაზე პოპულარული 2025 წელს.
ფერი არ არის მხოლოდ ესთეტიკა. ის გავლენას ახდენს ჩვენს განწყობაზე, პროდუქტიულობაზე და ასევე მადაზეც, ერთი სიტყვით ყველაფერზე. კონკრეტული ფერი კონკრეტულ გავლენას ახდენს ადამიანზე და ამის გათვალისწინება ინტერიერის დაგეგმვისას ძალიან მნიშვნელოვანია. მაგალითად ოფისებში ხშირად იყენებენ ლურჯს (რომელიც კონცენტრაციას აძლიერებს), ხოლო რესტორნებში – წითელს (რომელიც მადის აღმძვრელია). სახლში მნიშვნელოვანია, რომ შექმნათ ატმოსფერო, რომელიც კონკრეტულად თქვენი შინაგანი სამყაროს გამომხატველი იქნება და არა უბრალოდ, ტრენდებს მიჰყვეთ.
საღებავის შეძენამდე, მნიშვნელოვანია განსაზღვროთ ოთახის დანიშნულება.
საძინებელი მოითხოვს წყნარ ტონებს, ხოლო სამუშაო ოთახი შეიძლება იყოს უფრო ენერგიული. არ დაივიწყოთ ბუნებრივი განათების გავლენაც: მუქ ოთახებში უკეთესია ნათელი ტონების გამოყენება, ხოლო მზიანი ოთახებისათვის შეიძლება თამამად შეირჩეს უფრო მკვეთრი ფერები.
ფერების მომავალი ინტერიერში ძალიან მიმზიდველად გამოიყურება. 2025 წელს ბუნებრივი ნატურალური ფერები ისევ ტრენდშია, თუმცა მოულოდნელი მიქსებით. წარმოიდგინეთ მაგალითად ქვიშის ფერი ინტერიერში, მუქ მწვანე ფერთან კომბინაციაში, ან ტერაკოტა ფერის კომბინაცია ღია ყვითელთან. კიდევ ერთი საინტერესო ტენდენციაა “პასტელური ნეონი”. თითქოს ერთმანეთის საწინააღმდეგოა, არა?! მაგრამ ზუსტად ეს კომბინაცია, რბილის პასტელური ფერებისა და ნათელი ნეონური აქცენტების, ხდება პოპულარული. მონოქრომული ინტერიერიც ბრუნდება, თუმცა ახალი ინტერპრეტაციით. ახლა ეს არის ერთიანი ფერის სხვადასხვა ტონების და ტექსტურების თამაში, რომელიც ქმნის სიღრმეს და ინტერესს. საბოლოოდ, მოსალოდნელია ფერთა ეპოქების შერევა. ეს შეიძლება იყოს კომბინაცია ვინტაჟური ელფერების, როგორიცაა მაგალითად ხაკი და თანამედროვე, როგორიცაა კოსმოსური ნაცრისფერი.
არ არის საჭირო რადიკალიზმი. არ გადაღებოთ ყველა კედელი, თუ არ ხართ დარწმუნებული თქვენს არჩევანში. დაიწყეთ მცირე ცვლილებებით: დაამატეთ ტრენდული ფერები ტექსტილში – ბალიშებში, ფარდებში ან ხალიჩებში. შემოიტანეთ მცირე დეკორატიული ნივთები. თუ შედეგი მოგეწონებათ, შეგიძლიათ დაფიქრდეთ აქცენტურ კედელზე ტრენდულ ფერში.
Georgian 
English